« رد پاي دن کيشوت در مقاله “بابک واقعيتي غير قابل انکار”!

یازیق بابک` کی بئله یبر مودافیعه چیسی وار

اؤنجه ده دئمه لی یم کی منیم گئچن کی یازیم “بابک واقعيتي غير قابل انکار” آدیندا فارس دیلینه یازیلمیش ، نیه کی اوندا بیر سیرا فارس لار دا منیم موخاطبیم ایدی لر ، آما بو یازی دا منیم موخاطب لریم تورک و آذربایجانی وطنداشلاریم و اؤزلجه «آیدین تبریزی» بئی لری دیلر. اونا گؤره ده بو یازی اؤز آنا دیلیمیز ، آذربایجان تورکجه سینه یازیلیر.

آیدین تبریزی بئی لری بیر یازی دا «رد پاي دن کيشوت در مقاله “بابک واقعيتي غير قابل انکار”!» آدیندا بیر پارا سؤزلره ایشاره ائتدیلر کی من لازیم بیلدیم بو یازی نی یازیم و او سؤزلری کی او گئچن کی یازیمدا بیر پارا دلائله گؤره گتیرمه میشدیم و اورا یئری دویولدی گتیریم و او حالدا تبریزی بئیه ده بیر سیرا سؤزلری خاطیرلاییم.

بو آدی دئییلن یازی دا کی دئمک اولار بیزیم گئچمیش یازیمیزا نقد یازیلیب نئچه سؤز یاتیب ، هر نه دن قاباغ ایسته ییرم تبریزی بئی دن کی زحمت چکیب و بیزیم یازیا نظر سالیب و اونا نقد یازیبلار تشککور ائدیب و اؤز میننتدارلیغیمی بیله سینه بیلدیرم و بونو بیلیرم کی ایر او جنابین یازی سیندا دا منه گؤره بیر سیرا ایتتیهام لار دا اولسا ، نقد اوچون دور و دوست دان و عزیز وطنداشدان بو ایتتیهام لارا گؤره گیلئی لنماق اولماز. بو سؤزلر یاخشی اولدی کی دئییلیب و آرتیق سؤزلری دئمک اوچون یول آچیلدی.

بو نقد یازی دا منیم او گئچنکی یازیم و حرکتیم «دن کيشوت»ـون حرکاتینه بنزر دئییلیب ، یادیما گلیر کی بیر آیری عزیز دا بو ایصطیلاحی منه گؤره ایشلدمیشدی ، آما او پورپیرار بئیین وئبلاگیندا و بیر باشقا آدلا. او زامان اونا جاواب وئرمه دیم ، نیه کی او یازیق دا اؤز نظرینی دئمیش ، آما بو سیرا تبریزی جناب لری بیر آذربایجانلی سایت دا یسزه جاواب وئریب و دیققت ائله مه لی دیر و اونا گرک بیز جاواب یازیلسین تا بیر پارا آرا سؤزلر آرادان گئدیب و بیز بیربیریمیزین واقعی هدف لریندن خبریمیز اولسون.

تبریزی جناب لاری او یازی دا منیم یازیما هجوم آپاران دان سونرا ، پورپیرار بئی دن ده گیلئی لنه رک اوندان ایسته ییر کی ایر بابکین اولمامازلیقینا دلائلی وارسا ، اونلاری بیزه گؤسترسین تا بیز راحات و تئزلیغلا آدلی شانلی آتامیز بابکی اونوتوب و اونو دانیب و شاید بئله لیغلا پان فارس لارین قاباغیندا دوراق.
آما فیکر ائلیرم تبریزی جنابلارینین خبری یوخدور کی من او گئچنکی مقاله نی یازماق دان اؤنجه ، پورپیرار بئیینه موراجیعه ائدیب و اوندان ایسته دیم کی اؤز نظرینی بابکین باره سینده آیدینلیقلبا بیزه دئسین و پورپیرار بئی ده بیزیم او یازیمیزی سایمییاراق بیزی اؤزونون بیر آیری وئبلاگینا یوللادی. و حتمن فیکر ائیلیییردی کی بیزیم او وئبلاگا گئتمغیمیزنن بابکین دانماقی بیر اولاجاق. آما بئله دویول دیر ، و من چوخ تاسف لاندیم کی او یازی نی پورپیرار بئی دن گؤردوم و یئنه تاسف لاندیم کی ایندیه کیمین کیمدن حیمایت ائدیردیک ، ائله بیر آدام دان حیمایت ائیلع ییردیک کی بیزیم آذربایجانیمیزین تاریخینین زنگین نوقطه لریندن بیرینی دانیری.
و یئنه چوخ چوخ تاسف لاندیم کی بیزیم وطنداشلاریمیز کی آذربایجان یولوندا چوخلی چوخلی ایددیعالاری دا واردیر ، بو آرادا پورپیرار بئی له بیرلشیب و ایسته ییرلر دییه لر کی ایر لازیم اولسا بابک دن ده گئجه ریک.

یادیما گلیر بو یازی نین باره سینده عزیزلرین بیرینن دانیشیردیم کی دئدی ، بو مساله نین اوستونه وورما ، نیه کی بو ائیلیه بیلر بیر ایستیراتئژی اولا ، یعنی بیز پورپیرار بئی دن کی فارس دیر ، فارس لارین علیهینه ایستیفاده ائیلیه ریک. بوردا دیر کی «سیاست چوخ بیر کثیف بیر زاد دیر» سؤزو یادیما گلیب و او سؤزو قبول ائتمه دیم. نیه کی بیز آذربایجانین میللتی ائله بو سیاست لردن گیلئی لی ییک و دوز دویول کی اؤزوموز ده او یانلیش سیاست لر دن فایدالاناق. اوندان سونرا کاش بو مساله بیر ایستیراتژی حددینده قالایدی و بورایا چاتمییایدی نیه کی تبریزی بئیین یازی سیندان بللی دیر کی او جناب پورپیرار بئیین سؤزلرینه اینانی وار و شاید گلن کی یازی سیندا ایستی یه پورپیرار بئی له بیرلیقدا بابکین اولمامازلیقینا اینانجی وئره. آللاه بیلیر کی نه اولاجاق.

تبریزی بئیه دئمه لی یم کی من او یازی دا یازدیم کی بیزیم ایختیلافیمیز خاصه بابک باره سینده ، پان فارس لارینان اونو دیلینده دیر ، یعنی بیز اونو بیر تورک بیلیریک و فارس لار دئییرلر کی اونون دیلی تورکی دئییلدیر بلکه آذری- فهلوی آدیندا بیر دیل ایدی. یعنی فارس لار دا بابکین اولماقیندا شک لری یوخدور. و بیزیم ایختیلافیمیز اونلارلا هارا ، پورپیرار بئیین سؤزو کی اصلن بابکین اولماقینی دانیر هارا.
تبریزی بئی دوز سؤزو هر کیمسه دن اولسا گرک قبول ائیلیک ، بو منیم سؤزوم دئییل بلکه شیعه لرین بئشیجی ایماملارینین سؤزودور و بیز ده اؤزوموزو شیعه بیله رک گرک او بویوک لریمیزین سؤزلرینه اینانیمیز اولسون. ایر بیر سؤزو فارس دئسه ، فقط بونا خاطیر کی او فارس دیر حاققیمیز یوخدور او سؤزو رد ائدیب و اونا اینانیمیز اولماسین.
تبریزی بئی بیز بابکه نه موسلمان یا خوررمدین اولماقینا گؤره و نه ده تورک دیللی اولماقینا گؤره گؤوه نیریک بلکه اونون آذربایجانلی اولماقینا و بوندان موهوم اونون حرکتینه کی ظولمون قاباغیندا ساکیت اولمامازلیقینا یعنی ایمام حسین جنابلارینین سؤزونو یئرینه یئتیرمک اوچون اونا ایفتیخار ائدیریک.

البت بیلیرم کی سیزین بو سؤزونوز دوزدور کی بئله بیر یازی دان فارس لار دا ائیلیه بیلرلر ایستیفاده ائتسین لرو بیز یازی لاریمیزدا گرک بوندان آرتیق دیققت ائدک ، آما او یازی دا بیز او واقعیتی ذیکر ائدرک اونو تصذیق ائتمه دیم کی سیز ایستی یه سیز منی فارس لارین جاسوسی آدلاندیراسیز. کاش سیز ده منیم کیمین کی او یازی دان اؤنجه پورپیرار بئی لرینن دانیشدیم ، سیز ده منله دانیشاردیز و منیم نظرلریمی ایسته یردیز ، تا بئله ایری یول گئتمه ییب و بیر یولداشان ایتتیهام وورمایایدین.

تبریزی بئی! ایر بیر سؤزو فارس لار دا سئو سه لر ، او سؤزو گرک دئمی یک؟ منیم دوستوم چوخ سؤزلری وار ایدی کی دئمه لی ایدیم آما دئمه دیم و ایندی ده دئمی رم ، نیه کی قورخورام بوندان آرتیق آرامیزدا فاصیله یارانا و هئچ زاد اوستونده سؤزلر ائله یئکلسین کی سونرالار ائیلیه بیلمی یک اونو ییغیشدیراق ، نئجه کی بوندان قاباغ لار دا دا بئله بیر ایشلر اولموش و بیز گرک اونلاردان عیبرت آلاق ، آما بو باعیث اولماز کی واقعیت لرین اوستونه بیر پرده چکیب و گؤزوموزو اونلارا باغلایاق.

تبریزی بئی! گؤزلیم من او یازی دا هاردا پورپیرار بئیین هخامنشیان باره سینده سؤزلرینه ایشاره ائتمیشم کی بو سؤزو آرایا چکیرسیز؟ منیم دوستوم ائیله بوجور نتیجه توتمالار دیلار کی قویمورلار هر سؤز دئییلسین ، نیه کی تئز بیر موخالیف دالقا یارانیب و گلیب سنی دریانین اورتاسینا آپاراجاق و یئنه چوخ چتین اولاجاق کی ساحیله قاییده سن.

آما تبریزی بئی! یئنه چوخ تاسف لاندیم کی بو سئری سیزین آغزیزدان بونو ائشیددیم کی بویوردوز:«ارزش کارهاي آقاي پورپيرار در افشاي ماهيت تمدن سوز هخامنشيان و ساسانيان براي ما بسيار ارزشمندتر از هماسه بابک است» منیم دوستوم هر بیر زادین اؤز یئری وار و هئچ زادی باشقاسینا اؤزلجه تاریخ ساحه سینده اوستونلوک یوخدور. آما یئنه دئمه لی یم کی بو باره ده سیزنن موافیق دئییلم و پورپیرار بئیین یازی لارینی ، بابکین موقددس یولوندان اوستون بیلمیریم. دوستوم تعصصوب یاخشی دیر ، آما حددیجه. آرتیق تعصصوب بیزی دوزگون اینانلاریمیزدان دا اوزاقلادار.

مینم دوستوم ایر سیزین خبریز یوخدور کی او زامان کی عرب لر ایسلام آدینا آذربایجان اؤلکه سینه گیرن دن سونرا نه ایشلر گؤروبلر ، سؤز یوخدور. آما کاش بو باره ده آرتیقراق موطالیعه ائده سیز و بیله سیز نه لر بو آذربایجانین یازیق میللتینین باتشینا عرب لر زامانی گلمیش و اومودوم وار کی پورپیرار بئی لری کیمین هر نمنه نی یهودلارین جعلی بیلمیه سیز و بو مساله یه دوزگون بیر باخیش سالاسیز.
منیم دوستوم من عرب لر نن موشکولوم یوخدور و اونلارا ایحتیرا دا قویارم نیه کی بیزیم موقددس شریعتیمیزین هامی بویوک لری عرب ایدی لر. آما سؤز بودور کی عرب لرین هامیسی قرار دئییل موقددس ساییلالار. هر کیمسه اؤز قدریجه. او عرب لر کی بیزیم میللتیمیزین قانینی شیشه یه توتموش لار ، گرک اؤز شانی لریجه اونلارلا اؤز به اؤز اولاق.
منیم دوستوم هر میللتین ایچینده بئله بیر جماعات اولار ، فیکر ائیلیرسیز بیز تورک لرین ایچینده بئله بیر آدام لار یوخدولار؟ تاسف لا دئمه لی یم کی بیز آذربایجانین تورک لری ، تاریخا دونه رک ، هامی دان چوخ ائیله تورک لر دن ، یعنی آرزوموزدن ضربه یئمیشیک ، آما هر سؤزو کی دئمک اولمور. ما شا الله بیر تعصصوب پرده سی وطنداش لاریمیزین گؤزلرینین قاباغیندا وارکی قویماییر هر سؤز دئییلمیش اولسون.

منیم دوستوم بو کی ایندی کی حاکیم اولان سیاست لر ، عرب میللتینه ده ظولم ائدیر ، بیر گیزلین مساله دویول و بو کی بیز گرک اونلارلا یول بیر و یولداش اولاق بوندا دا سؤز یوخدور. آما بو باعیث اولماز کی واقعیت لری دانیب و تاریخین آیدین یازی لارینی گؤرمویک.

تبریزی بئی ! من دؤزه جه یم تا سونرالار سیزین نظریزی بابکین باره سینده یئنه خبرله شم (ایر پورپیرار بئی بوندان آرتیق ایفاضات ائیب و سیزی بابکین اولمامازلیقینا راضی ائتسه) و او زامان گؤروم سیزده بو سؤزه شامیل اولورسوز یا یوخ کی:”مشک آن است که خود ببويد نه آن که عطار بگويد!”

اوندان سونرا منیم عزیز دوستوم ، تبریزی بئی! سیز کی ایسته ییردیز اؤز یازیزدا منیم یازیما جاواب وئره سیز ، کاش اؤز آنا دیلیزه ارزیش قائیل اولوب و اؤز یازیزی تورک دیلینه یازایدیز ، منده او گئچمیش یازینی ایکی دیله یازمیشدیم یعنی بو آردا آنا دیلیمی اونوتمامیشدیم کاش سیزده اونوتمییایدیز. البت بیلیرم کی بو ایش ده بیر باشقا سؤزده یاتیب کی کاش بو ایشدن ده اوزاق اولایدیز.

سؤزومون سونوندا یئنه دئمه لییم کی:
قوی بیلسینلر یاد ائللرده
آذربــایــجان تــورپاغینیـن
بابـــک کیمی یاراغی وار