« بيرينجي بؤلوم »

« شيخ الاسلامي ، قتل اتابك ، فارس شوونيسمي و آذربايجان »

مقدمه :

آذربايجان تورك ميللتينه ، ايران تركيبينده اولاراق ايره لي سورولموش درين اكونوميك ، كولتوره ل ، سياسا ل و توپلومسال تضييق لر و توهين لر و آغير آسيمالاسيون سيراسيندا ، 1366 – نجي ايللرده « دوقتور جواد شيخ الاسلامي » نين يازديغي « قتل اتابك و شانزده مقاله ديگر » اثري كيهان مطبعه سينده چاپ اولونموشدور .

بوكيتابين يازيچيسي - دوقتور جواد شيخ الاسلامي ميلادي 1948 - نجي ايللرده ، انگلتره نين لندن ئونيوئرسيته سينده ، اقتصاد و سياست اوزره تحصيل آلميش سونرا دكتراسيني ائله همين اختصاص اوزره آلمانيانين هايد لبرگ ئونيوئرسيته سينده ن آلميشدير . سونرا ايرانا دؤندوكده ، تهران ئونيوئرسيته سينين حقوق فاكولته سينده « ديپلماسي تاريخي » اوزره تدريسه مشغول اولموش ، اسلامي انقلابدان سونرا دا خارجي ايشلر- ناظرليينده اؤنملي پستلاردا ايشله ميشدير . بو آجيدان دا آدين قيد ائتد يييميز كتاب داها چوخ اهميته ماليك دير . نيه كي يازيچينين بير علم آدامي اولاراق عين زاماندا بير سياستچي اولاراق ، همين كتابدا اؤز باخيشين آذربايجانا ، اونون ميلله تينه ، ديلينه ، كولتورونه ، تاريخينه و بوتون وارليغينا ، آيدين – آچيق ، چكينمه دن سؤيله يير .

« قتل اتابك » كيتابينين 227 - نجي صحيفه سيند ن باشلانان « زبان فارسي نشان والاي هويت ايراني »

مقاله سي ، تكجه كيتابين يازيچيسي يوخ بلكه بوتون آپارتايدي و شوونيستي فيكيرلري داشيانلارين اساس فيكيرلريدير .

بير آذربايجانلي اولاراق اوخوياجاغينيز سطيرلرده ، چا ليشميشام آدي چكيلن مقاله ده ايره لي سورولن غير علمي و آپارتايد سياستلري و فيكيرلري يئترلي قدرعلمي بير شكيلده تنقيد ائديب ، اولدوقجا كامل بير شكيلده ، اوچ بؤلومده جوابلانديريب ، آذربايجان ميلله تينين آييق وجدانلارينا مراجعت ائده م . 18 صحيفه ده سيغينان ، آدين چكديييميز مقاله بئش بؤلومده يازيلميشدير ، باشليغيني نظره آلاراق - « زبان فارسي نشان والاي هويت ايراني » - مقاله ني اوخودوقدا ، آذربايجان توركونه و تورك ديلينه يامان - يووزدان سونرا باشقا بير مؤوضوع گؤزه چارپمير . سانكي حؤرمتلي دوقتور اؤز مقاله سينه آد سئچنده مؤوضوعو بير باشا اونوتموشلاردي .

بيرينجي بولوم :

مقاله نين يازيچيسي بيرينجي بؤلومده فيكيرداش و مسلكداشي اولان « دوقتور محمود افشار» ين مقاله لريني خاطيرلاداراق ، اونون فيكيرلرينه قاتيليب اؤز سؤزونو آذربايجان و زنجان شهرلري و كندلرينده فارس ديلينين ضعيفله ييب و نتيجه ده بؤيوك و درين خطرلر و زيانلارينين تؤره نمه سيني دوشونوب ، ايضاح ائديب ، بو چتينليگي آرادان قالديرماق اوچون بير پارا يوللار اورتايا قويماقلا سؤزلريني باشلايير.

دوقتور محمود افشارين فيكيرينجه ايران بوتوولويونو بئش رنگلي خطرلر تهديد ائدير و بونلاردان ان اؤنمليسي ده « خطر زرد » آدلي بير خطردير . جناب شيخ الاسلامي ده اؤزمقاله سينده افشارين بو فيكيرينه تام معنادا قاتيلاراق فارس ديلينين آذربايجاندا و زنجاندا و بوتوولوكده تورك بؤلگه لرينده گله جه جكده محو اولوب آرادان گئتمه ييني ايرانا بؤيوك بير خطر حساب ائد يب ، ايرانين بوتون وطن سئور انسانلارينين يارديميني ديله يه ره ك آچيقلامايا باشلايير :

« بايد طرق و راههاي صحيح و اساسي پيشنهاد شود… و كساني كه حقيقتا علاقمند به حفظ تماميت ارضي ايران هستند و خطرات ناشي از تفوق برخي زبانهاي محلي را نيك تشخيص ميدهند ارائه دهند » . ق . اتابك ص 227

حؤرمتلي يازيچي ، تاريخيميز سوره سينده آذربايجانلي لارين هر زامان ايران بوتوولويونده بوتون وارليقلاريله چاليشيب ، جانلاريندان بئله كئچمه لريني تام اونوتموشدور . بو اؤلكه نين بوتوولويونه هر زامان يابانجي لارين طرفيندن بير تهديد اولموش ، آذربايجان توركو مودافعه نين بيرينجي صفينده دايانميشلاردي ، ايندي ايسه همين انسانلارين ، اؤز ديللرينده دانيشمالاري « ايران بوتوولويونه بير تهديد دير» سؤيله يير حؤرمتلي دوقتور . قوزئي ده ، گونئي ده و باتيدا متجاوز يابانجيلارلا دؤيوشنلر كيملر اولموشلار ؟ آذربايجانلي لار

ايران مودافعه سي اوغروندا جا نيني و ماليني صداقتله وئره نلر كيملر اولموشلار ؟ آذربايجانلي لار

آما ايندي يابانجي ، اؤزگه ، ايرانا و فارس ديلينه تهديد ، حؤرمتلي يازيچينين باخيميندان دا كيملر اولموشلار ؟ يئنه آذربايجانلي لار . جناب يازيچي شا شيرديجي سؤزلرينين آرديني دوتوب ، آذربايجان ميلله تينين تورك ديليني و خوزستان ميلله تينين عرب ديليني يئرلي ديل ( محلي ديل ) آدلانديراراق ، « بو ديللرين گليشيب ، گئنيشله نمه- سينين قارشيسيني آلماق لازيمدير » دئيير و تورك وعرب ديللريني كورد ديلي ايله توتوشدوراراق سؤيله يير: « ... زيرا اين دو زبان محلي به عكس زبان كردي ، در گذشته مورد سوء استفاده پان تورانيستها و پان عربيستها كه هدفشان بريدن قطعاتي از خاك ايران بوده قرار گرفته است و در آتيه هم ، اگر مسامحه شود ، هميشه به عنوان حربه ائي خطرناك عليه ما به كار خواهد رفت . » ق.اتابك ص 227

جناب يازيچي سانكي تورك وعرب ديللرينين دونيا ديللري سيراسيندا آلديغي يئرلري بيلمه ميشدير . خاطيرلاتمالييام ، بوايكي ديل بيرلشميش ميللتلر تشكيلاتينين ( ب.م.ت ) يونسكو ارگاني طرفيندن ان قاعده لي و زنگين ديللردن تانينماقدادير، آما تاسف كي يازيچي بو آيدين حقيقتي بيله رك يئنه ده بو ايكي ديلي محلي آدلانديراراق آذربايجان و عرب ميللتلرينه تحقيرلر و توهينلر ياغديراندان سونرا بوديللري ايران هويتينه بير خطر حساب ائدير و عين زاماندا آيدين – آچيق بير شكيلده تبعيض و آيري سئچگيليك سياستيندن دوغولان تفكورونو اوزه چيخاريب ، هند آوروپا ديللريندن يعني فارس ديلي ايله عيني كؤكدن اولان كرد ديلي حاققيندا ايرانا هئچ بير خطري اولماياجاق سؤيله يير . ديلچي عاليملر طرفيندن بوتون دونيا ديللري ، كوك باخيميندان دؤرد يئره بولونور :

1- التصاقي يا پسوندي يا اورال آلتاييك ديللر ( تورك ديلي و ... )

2- قالبي يا تصريفي يا سامي ديللر ( عرب ديلي و ... )

3- تحليلي يا آريا كؤكلو يا هند آوروپا ديللري ( فارس ديلي و ... )

4- هجائي ديللر ( چين – تبت ديللري و ... )

بئله آنلاشيلير كي ايران اؤلكه سينده ياشايان ميللتلر و قوملارين ايچينده التصاقي و سامي ديللي كوتله لر، تحليلي ديللي توپلوما بير خطر و تهديد كيمي حساب اولونورلار . جناب شيخ الاسلامي اؤز نظريه سينه هئچ علمي سبب وياخود تاريخي اؤرنك ده اورتايا قويمور . هانسي پان تورانيست و پان عربيست حركتلر يارانميشدير كي هله آيريمجيليق سياستي ده ايره لي سورسونلر . ايراندا تاريخ بويو ظلم ، استعمار و استثمار قارشيسيندا يارانان حركتلرين چوخونلوغو ، تاريخي فاكتلار اساسيندا آذربايجاندا يارانميشدير . عرب استيلاسينين قارشيسيندا 22 – ايل دايانان بابك خرمدين ( 201 هجري قمري ده ) آذربايجاندان قاوزانميش و ايندي ده آذربايجانين دؤيوش و دايانيش سيمگه سينه چئوريلميشدير . چاغداش زامانلاردا ايسه مشروطيت حركاتيندا ، آذربايجاندا و تبريز شهرينده شاهليق ديكتاتورلوغو سيستئمينين باسقيسينا باخماياراق ، تبريزين غئيبي مركزي و اوندان سونرا ستارخان و باقرخانين يول گؤسته ريشلري و اؤندرليگي ايله ، آذربايجانلينين الي ايله مشروطه بايراغي يعني دئموكراسي و ازادليق بايراغي ، شرق اؤلكه لرينده بيرينجي دفعه اولاراق قالديريلميشدير . شيخ محمد خياباني و اوندان سونرا دا سيد جعفر پيشه وري آذربايجاندا ، تبعيض و ظلم قارشيسيندا فدراتيو بير سيسئتمي نه تكجه آذربايجاندا بلكه بوتون ايراندا ياراتماق ايسته ميشلر و بويولدا جانلاريندان بئله كئچميشلردي ، آما شيخ الاسلامي و اونون گئريچي و مرتجع فيكيرداشلاري ، اونلاري آيريمجي ، پان تورانيست ، و پان توركيست آدلانديريب اللريندن گلني بو شرفلي و آزادليق سئور و مترقي تفكوره ماليك اولان انسانلارين شخصيتلريني زده لمكده اسيرگه مه ييبلر. گؤسته رديييميز پاراقرافين سون سطيرينه داها آرتيق دقتينيزي خواهيش ائديرم ، جناب يازيچي بو سطيرده « در آتيه هم ، اگر مسامحه شود ، هميشه به عنوان حربه ائي خطر ناك عليه ما به كار خواهد رفت .» سؤيله يه رك ، يئني دن تبعيضدن دوغولان آپارتايدي فيكيريني اوزه چيخاريب ، سانكي آذربايجان تورك ميلله تي و خوزستانين عرب ميلله تي اؤزگه و يابانجي و بوتون ايراندا ياشايان فارس ديللي كوتله و اونلارلا عئيني كؤكده اولان توپلوملار اؤز و بواؤلكه نين صاحابي ديرلار . عزيز اوخوجو سيزدن سوروشوب سيزه مراجعت ائديرم ، آذربايجان تورك ميلله تيندن چوخ بو اؤلكه نين بوتوولويو و انكيشافي اوغروندا چاليشان ، اونون اوغروندا قان وئرن ، جان وئرن ، شهيد وئرن ميللت وارمي ؟

داها شاهليق ديكتاتورلوغو دؤورونه تاي ايراندا تورك ميلله تينين 7000- ايلليك مدنيت تاريخيني اؤرت – باسدير ائديب ايران تاريخيني متجاوز هخامنشلرله باشلاييب تحريف ائدن يالانچي تاريخچيلر ، دونيا گؤزو اؤنونده بو بويدا زنگين ديله و مدنيته و كولتوره ماليك اولان آذربايجان تورك ميلله تيني دانانلار، رسواي اولورلار . ايللر بويو آذربايجان تورك ميلله تينين باشينا چماق اولان بو يالانلار اوزه چيخير . جناب شيخ الاسلامي و اونون فيكيرداشلاري آرتيق حقيقتلري باشا دوشمك مجبورييتينده ديرلر . آريا كؤكلو توپلوملارين ميلاددان 900 – ايل اؤنجه ايران بؤلگه سينه كؤچوب ، ايلام امپرياسينين اذ نيله ساكن اولماقدان 3500 - ايل اؤنجه التصاقي ديللي يعني اينديكي آذربايجاندا ياشايان تورك ميلله تينين آتا بابالاري ياشاييب مدنيتلر – حؤكومتلر و گئنيش امپريالار ياراتميشلاردي ، اينديكي فارس ديللي كؤتله نين ده ايراندا ياشاماق اذنيني يئرلي تورك ميلله تي طرفيندن ( ايلام حؤكومتي طرفيندن ) وئريلميشدير. ايندي نئجه اولموش كي جناب يازيچي و يولداشلاري و حاكم اولان فارس ديلي اؤز اولموش و بيز آذربايجان تورك ميلله تيده اؤزگه !

دؤنه – دؤنه بو غيرعلمي و آچيقجاسي ضد اينساني يازينين سطير – سطيرينده تورك ميللتينه توهينلر و تحقيرلر اوخوجونون اوزونه چيرپيلير ، جناب يازيچي سون درجه وقاحتله اوخوجويا مرحمت بويوروب و مؤوضوعون اصليني ، بير پارا غيرعلمي و قوندارما دليللر و ثبوتلار ، احمد كسروينين « آذري يا زبان باستان آذربايگان » كيتابيندان و عين زماندا حمد الله مستوفي نين « نزهة القلوب » آدلي كيتابيندان گتيرندن سونرا ، اورتايا قويموش : « اصل موضوع اين است كه هر آذربايجاني يا زنجاني اعم از اينكه شهر نشين يا روستا نشين باشد ، بتواند زبان فارسي را اگر نه سليس تر و روانتر ، لااقل به همان سلامتي كه امروزه به زبان تركي صحبت ميكند ، به كار برد و وقتي اين اندازه پيشرفت در كار تعميم زبان ملي حاصل شد آنوقت ديگر خطر تفوق زبان تركي در اين دو ايالت شمالغربي ايران به كلي منتفي است زيرا ... هر آن فرد آذربايجاني يازنجاني كه به زبان فارسي مسلط شده باشد – زبانيكه اورا قادر سازد تا ابيات شورانگيز شاهنامه ، غزلهاي مفرح سعدي و حافظ ، و رباعيات نغز عمر خيام را به گوش جان بشنود و از اعماق روح درك كند – چنين فردي ديگر محال است تن به سير قهقرايي دهد و زباني به اين قشنگي و زيبايي رابا زبان محلي عوض كند . » ق . اتابك ص 229

ائله همين پاراقرافين آرد ينجا ، جناب شيخ الاسلامي ميللي ديل و قومي ديلين آنلاميني بيلمه دن فارس ديليني عيني زاماندا ميللي ديل و قومي ديل آدلانديراراق ، سؤيله يير : « ... افراد روستاها و شهرهاي آذربايجان و زنجان افرادي يافت ميشوند كه زبان فارسي را كه زبان ملي و لسان قوميت آنهاست ابدا نميفهمند و خطر حقيقي به عقيده من در همين جاست والا اگر سكنه اين دوايالت زبان فارسي را خوب بلد باشند آنوقت آشنايي به زبان تركي ( وحتي مكالمه تفنني به اين زبان ) آسيبي از آن نوع كه اكنون بالقوه وجود دارد متوجه استقلال و تماميت ارضي ايران نخواهد كرد . » ق . اتابك ص 229

سانكي آذربايجان تورك ميللتي ايند ييه قدر ديلدن و ادبياتدان محروم اينسانلارديرلار و گوجلو يبر ادبيات آختاريرلار كي جناب يازيچي آذربايجانين يازيق ميلله تينه اوره يي يانميش ، مرحمت ائديب و اؤز ادبياتلاريني و ديللريني چوخ ال آچيق بير شكيلده بو مدنييت سيز ! ميللتله پايلاشماق ايسته ييرلر . محترم يازيچي و اونلارين فيكير داشلاري ، آذربايجان تورك ميلله تينين نئجه بير ديل و ادبياتا صاحاب اولدوغونو و هابئله دونيا دا يئريني هاميدان ياخشي بيليرلر ، نه تكجه بوغرضلي و شوونيست اينسانلار ، آرتيق دونيا بو گونشدن پارلاق حقيقتلري باشا دوشموشلردي ، كئچميش ايللرده بيرلشميش ميللتلر تشكيلاتي يونسكو ارگاني طرفيندن ، نئچه ايل سوره سينده هر بير ميلادي ايلي ، دونيا مقياسيندا ، آذربايجان تورك ميلله تينين ادبي شاه اثرلري و نهنگ شاعير لري آديله آدلانديريلير( دده قورقود ايلي – فضولي ايلي ) . بو گئرچكلري بيلرك غرضلي يازيچي تام بير وقاحتله ، آذربايجان تورك ميلله تينين ئؤز كولتور و ديل و ادبياتلاريني ياشادماغي و اونلارلا ياشاماغي اؤ اصطلاحيله « سير قهقرايي » سانير، عوضينده فارس ديليني ده گؤزل و مترقي ديل آدلانديرير . البته كي هر ديل گؤزلدير ، هر ديلين گؤزه لليكلري و اؤزه لليكلري واردير ، تاريخ بويودا آذربايجان توركو بو حقيقتي بيله رك شوونيستي و آپارتايدي تفكوروندن اوزاق اولموشدور و ائله بوتفكور اساسيندا فارس ديلينين و ادبياتينين دونيا مقياسلي شاه اثرلريني آذربايجان تورك ميلله تي ياراتميشلاردي ، اؤرنك اولاراق بؤيوك مولانا ، خاقاني ، نظامي ، تبريزلي صائب ، تبريزلي قطران ، پروين اعتصامي ، شهريار و باشقالاري . هاميميز بواينسانلارين عوض سيز خدمتلريني ، فارس ادبياتينا و ديلينه آپ – آچيق بيليريك ، آما بوعوض سيز خدمتلرين قارشيسيندا بو اؤلكه ده ديليميز ، ادبياتيميز ، كولتوروموز و بوتون وارليغيميز بئله ، فارس شوونيسمي طرفيندن بير تهديد ساييلير . غرضلي يازيچي آذربايجاندان و آذربايجان توركوندن ، حدسيز اؤفكه سيني ائله همن رفرنس ائتديييم پاراقرافين سطيرلرينده بيلمه يه – بيلمه يه اوزه چيخارير . اونداكي شاهنامه نين بيت لري ندن ، سعدي ، حافظ و عمر خيام دان دانيشير ، هئچ ده مولانا ياخود خاقاني و نظامي و باشقالاريندان بئله آد دا آپارمير .

حؤرمتلي آما غرضلي يازيچي قيد ائتدييميز معلوم الحال كسروينين غير علمي و اولدوقجا غرضلي نظريه سيني اساس توتاراق آذربايجان ميلله تينين ديليني ، قارا قويونلولار و آغ قويونلولار زامانينا قدر آذري اولوب و 70 - ايل سوره سينده تورك ديلي قارشيسيندا منسوخ اولدوغونو تكرار سؤيله يه رك ، « اينديكي آذربايجان توركجه سيني 50 – ايل سوره سينده بير يوللوق آرادان قالديريب آذربايجاندا بو ديلي منسوخ ائتمك اولار » دئيير .

بو نظريه نين رد ينده تكجه ايكي استدلالي يئترلي گؤرورم ، احمد كسروينين نظرينه گؤره آذربايجان ميلله تينين ديلي 70 ايلده آق قويونلولار و قارا قويونلولار زامانيندان بري حاكم سيستمينين باسقيسي نتيجه سينده ، تام توركجه يه چئوريلميشدير ، بو بير گولونج اعادير . بير ميلله تين ديليني ، اونونلا برابر بوتون تفكرونو – آداب و عنعنه سيني ، اساطيرلريني و ياشاييش طرزيني ، 70 ايل بويونجا - هئچ بير اؤيره تيم ايمكانلارينين اولماديغيني دا نظره آلاراق - آذربايجان اؤلكه سينين ان اوزاق كندلرينين قوجاسيندان دوتموش ، ياشسيزينا قدر نئجه دييشمك اولاركي ؟ ، شمسي 1304 – نجو ايلدن بري شوونيست پهلوي رژيمي ايرانا تام حاكم اولدوغوندا ، صنعت و تكنولوژيك ايمكانلاري او جمله دن راديو – تلويزيا ، چئشيدلي كتاب و قزئته مطبعه لري ، اؤيرتيم سيستئملريندن فايدالاناراق ، 80 ايلدير آذربايجان ميلله تينين تكجه ديليني ده ييشمه يه وار گوجلريله چاليشيرلار آما نه قدر كي زامان كئچميش اوقدر ده باشاريسيز اولموشلار . ايكينجي استدلال بو نظريه نين ردينده ، قوندارما آذري آدلانان بو خيالي ديلين هئچ بير تاريخي سندي - اذبي اثري ياخود بو ديلده هئچ بير كيتابين اولماديغي دير . تاريخده ياشاميش بير ديلين ادبي منبعلري و گنجينه لري ، اوندان قالميش لغت كتابلاري – علمي كيتابلار اولماليدير و بو گون اليميزه چاتماليدير ، آما تكجه بير كيتاب – تكجه بير كيتاب بو ديلدن هئچ بير يئرده يوخدوركي ان آزيندان بيزده آذربايجانلي اولاراق اؤز قديم ديليميزي اؤيره نك !!! .

جناب شيخ الاسلامي كسروينين بو مجعول نظريه سيني بير ثبوت كيمي اورتايا قوياندان سونرا داها بير ثبوتدا ! « عبدالله مستوفي » نين « نذهة القلوب » كيتابيندان گتيرير : « حمدالله مستوفي قزويني كه خود در حدود سال 1311 ميلادي ( = 710 هجري قمري ) مستوفي و رئيس ديوان عالي قزوين و ابهر و زنجان بوده است در كتاب نذهة القلوب ( كه به سال 740 هجري قمري تاليف شده ) صريحا به اين موضوع اشاره ميكند كه زبان مردم زنجان پهلوي بوده است .» ق . اتابك ص 228

جناب يازيچينين ثبوتلاري دا متضاددير . آذري نه دير ، پهلوي نه دير ، سانيرام يازيچي اؤزوده بيلمه يير ، آما هر حاليندا آذربايجان ميلله تينين تورك اولماديقلارينا ، كسينليكله و قطعييتله فتوي وئرير .

جناب يازيچي صفويلر سلسله سينين ايراندا حاكم اولدوقلاريندان سؤز آچاركن ، اوره يينده اولان اؤفكه ني صفويلره و اؤزه لليكله شاه اسماعيل خطائي يه گيزله يه بيلمه يير : « پس از تاسيس سلسله صفوي در ايران ، از آنجا كه موسس اين سلسله ( شاه اسمعيل ) خود از طرف مادر نوه حسن بيك آق قويونلو و بنابراين نيمه ترك بود نه تنها از نفوذ زبان تركي در آذربايجان كم نشد بلكه نفوذ و گسترش آن ... افزايش يافت . » ق . اتابك ص228

مقاله نين بيرينجي بؤلومونون سونونا گلديكده ، يازيچي آذربايجان ميلله تينين تورك ديليني بير يوللوق محوائديب يئرينه فارس ديليني آذربايجان اوشاقلارينين بئينينه سوخمايا ، دقتي جلي ائدن بير يول اورتايا قويموش و ايرانين بوتون فارس ديللي توپلوملاريندان بويولدا چاليشمالاريني خواهيش ائدير : « ... تاسيس كودكستانهاي مجاني و ياد دادن زبان فارسي ( به عنوان زبان نخست ) به كودكان شهرنشين و روستايي استانهاي آذربايجان و زنجان و خوزستان است چون زباني كه از بچگي در ذهن اطفال ملكه شد ديگر به اين زودي مغلوب زبانهاي محلي نخواهد شد . نيز ميتوان جوانان كم سال آذربايجاني و زنجاني و خوزستاني ( اعم از دختر و پسر ) را به سيستم مبادله جوانان ... براي يكي دو سال در خانواده هاي محترم فارسي زبان كه زبان متداولشان فارسي باشد به عنوان ميهمان پذيرفت و از اين راه به ترويج و تحكيم زبان فارسي ميان اين گروه سني ( 12 تا 16 سال ) كمك كرد . » ق . اتابك ص229

بو يازيلاري نظره آلاراق يازيچينين چيركين و شوونيستي تفكورو داها آرتيق و آشكار اورتا يا چيخير ، 1304 – دن ايراندا بوتون حاكميتلر طرفيندن فارس ديليني آذربايجانا قونداريب تورك ديليني محو ائديب بير يوللوق سيلمك آماجيله 80 ايلليك ، آرا وئرمه دن سون درجه وقاحتلي چاليشمالار ، جناب يازيچينين باخيميندان يئترلي دئييل و نتيجه ده اوخودوغونوز شاشيردان اؤنه ريلر اورتايا قويولموش .

ميلادي 1946 – نجي ايللرده ، بيرلشميش ميللتلر تشكيلاتي ( ب . م . ت ) طرفيندن انسان حاقلارينين قورونماسي حاقيندا ، بير كنوانسيون تصويب اولونموشدور ، قيد ائتمك لازيم دير كي همين كنوانسيون شمسي 1334 – نجو ايللرده ايران حؤكومتينين پارلامئنتي طرفيندن قيده آلينميشدير .

بو كنوانسيونون 2 – نجي ماده سي ژنوسايد حاقيندا بئله قرار وئرير :

بو عمللر ژنوسايد آدلانير :

1-   توپلومون اويه لرينين اؤلورولمه سي ( قتلي )

2-   توپلومون اويه لرينه فيزيكسه ل و روحسال صد مه لر

3-   توپلومون كل و يا بير كيچيك بؤلومونو فيزيكسل شكيلده محو ائتمك آماجيله ، توپلومون ياشاييش طرزيني دييشديرمك يولو ايله صدمه لر.

4-   زوراكيليقلا بير پارا عمللري توپلوما ، جمعييتيني آزالديب چوخالدما سياستي واسيطه سي ايله تحميل ائتمك .

5-   توپلومون اوشاقلاريني اجباري شكيلده باشقا توپلوملارا گؤنده رمك ( انتقال اجباري كودكان )

بيرينجي ، ايكينجي و اوچونجو عمللر فيزيكسه ل ژنوسايد ، دؤردونجو عمل بيولوژيك ژنوسايد و بئشينجي عمل ايسه كولتوره ل ژنوسايد آدلانير .

قيد ائتمك لازيمدير ، حقوقي باخيمدان ژنوسايد مجرملري عادي مجرم حساب اولونور . نه تكجه ژنوسايد عاملي بلكه بو جرم ده اشتراك ائتمك ، جرمو باشلاماق ، تباني و تحريك و تبليغ ده ژنوسايد حاقيندا مجرم تانينيب بين الخالق محكمه لرده محاكمه اولونماليدير .

ج - ر - ارشتنابلي

تبريز - 1384

« آردي وار »