يو. ائن. پي. او.دا نه لر اولدو؟

Februar 14, 2007 مختلف یازیلار

مهران بهاري

گئچه نلرده گونئي آزربايجانين يو. ائن. پي. او. تشكيلاتينا تمثيل ائديلمه يه ن بير ميللت اولاراق قبول اولوندوغو ساليغي (خبري) ياييلدي. نورمال قوشوللاردا (شرطلرده)، بئله بير اولوسلارآراسي هٶرگوته (تشكيلاتا اويه لييينين، تورك خالقيميزين ميللتله شمه سوره جي و گونئي آزربايجانين ميللي حاقلاري اوغروندا آپارديغي ساواشيمينين دونيايا چاتديريلماسي آچيسيندان سئوينديريجي بير ساليق (خبر) اولدوغو كسيندير آمما بو اولايلا ايلگيلي بير سيرا نوقطه لر، اٶزه لليكله بو اويه لييي گئرچه كله شديره ن  گاموح آدلي سيياسي تشكيلاتين گٶسته ردييي داورانيشلار و مودافيعه ائتدييي دوشونجه لر، اوزوله ره ك دورومون چوخ دا سئوينه جك بير ياني اولماديغيني اورتايا چيخارميش و بوتون اولايي كٶلگه له ميشدير

يو.ائن.پي.او.`نون آنا صحيفه سينده بو هٶرگوته يئنيجه قبول ائديلميش آلتي اويه (عوضو) حاققيندا بيلگيلر وئريلير. بو اويه لره ايران كوردوستاني و گونئي آزربايجان دا داخيلدير. بو ايكي يئني عوضو حاققيندا وئريله ن آچيقلامالاري قارشيلاشديراندا، گونئي آزربايجانلا ايلگيلي وئريله ن بيلگي و آچيقلامالار، سٶزون گئرچك آنلاميندا اوتانج وئريجي، ايسكاندال و ايفتيضاحدير. بئله بير آچيقلاما يازيسي، تكجه و تكجه تورك خالقي و گونئي آزربايجان`ين دوشمنلري طرفيندن حاضيرلانميش اولابيله ر. اورادا تورك خالقي و گونئي آزربايجان`ين ميللي دئموكراتيك موجاديله سي تمامن گٶرمه زدن گلينه ره ك تحريف ائديليب و بوتونويله بير پان ايرانيست ذئهنييتله آچيقلانيبدير. يو.ائن.پي.او. نون صحيفه سينده وئريله ن ايلك آچيقلامالار بئله دير
www.unpo.org/a…

Iranian Kürdistan: Since Iranian authorities annexed the Republic of Mahabad (Kürdistan) in 1946, the aspirations for autonomy and self-rule amongst Iran’s Kürdish population has been systematically repressed. The Democratic Party of Iranian Kürdistan works to promote their national rights, and aspires to a Federal and Democratic Iran with equal respect for all Iran’s minority communities

Southern Azerbaijan: Working towards improving the conditions of all minorities living within Iran, the Southern Azerbaijan National Awakening Movement (SANAM) represents its Azeri population, the largest minority community living within Iran, and advocates a peaceful transition towards democracy in Iran

اساس مساله: توتاليتئر هوسلر، آنتي دئموكراتيك يٶنته ملر، لومپن ادبييات

گاموح، يو. ائن. پي. او.`يا عوضو اولماغي، باشقا چوخلو اولايدا ياپديغي تكين، اٶز ليدئريني تورك خالقينين ليدئري، اٶز بايراغيني گونئي آزربايجانين ميللي بايراغي و گاموحون اٶزونو ده گونئي آذربايجانين تك تمثيلچيسي اولاراق گٶسته رمك و تثبيت ائتمك اوچون قوللانميشدير. بو ايسه بوتون ماجرايا كٶلگه سالان و اونو اوزوله جك بير گليشمه اولماغا مجبور ائده ن باشليجا عاميلدير

١- كوردوستان بٶلومونده، دوغرو اولاراق، هئچ بير سيياسي تشكيلات، كورد خالقينين تمثيلچيسي اولاراق گٶسته ريلمير، ايران كوردوستان دئموكرات پارتيسينين ده كورد خالقينين حاقلاري اوغروندا چاليشديغي (DPIK works) بير تشكيلات اولدوغو سٶيله نير. گونئي آزربايجان بٶلومونده ايسه، يانليشليقلا  گاموح تشكيلاتي گونئي آزربايجان خالقينين تمثيلچيسي (SANAM Represents its Azeri Population) اولاراق گٶسته ريلير آيريجا بو. ائن. پي. او.` يا، سون درجه آنتي دئموكراتيك شكيلده اٶنه ريله ن و بونا ائعتيراض اولاراق اٶزو و يانداشلاريندان باشقا هامي طرفيندن ردد ائديله ن  گاموح بايراغي، گونئي آزربايجانين ميللي بايراغي دييه سونولموشدور

٢- ياپيلان اوياري و تنقيدلر سونوجوندا، يو.ائن.پي.او.نون گونئي آزربايجان و موجاديله سي حاققيندا وئردييي يانليش آچيقلاما و بيلگيلرين بير بٶلومو داها سونرا دوزه لتيلمشيدير. بونا رغمن اساس سورونلار او جومله دن گاموحون گونئي آزربايجاني تمثيل ائتدييي،  گاموح بايراغينين گونئيين ميللي بايراغي اولدوغو كيمي اويدوروق ايدديعالار دوزه لتيلمه ميشدير

٣-  گاموح و يانداشلاري، بو داورانيشلاريني و يو. ائن. پي. او.`يا دا يانسيميش اولان و آشاغيدا سيرالانان بير سيرا يانليش سيياسي گٶروشلريني تنقيد ائده نلردن مدني، اٶلچولر و سيياسي اخلاق گره يينجه تشككور ائتمك يئرينه، اونلارا سايغيسيزليق ياپماق، لومپن تارتيشمالارا گيرمك و اونلارين شخصييتلريني قارالاماق يولونو سئچميشدير

گاموح تشكيلاتي بو سورويا جاواب وئرمه ليدير: نه اوچون آلتميش ايلدن آرتيق ايران مركزي دٶولتي ايله كسينتيسيز، اٶلكه ايچي و اولوسلارآراسي آلانلاردا سيياسي، ديپلوماتيك حتتا عسكري اولاراق موجاديله ائده ن كوردوستان دئموكرات پارتيسي، اٶزونو كوردوستان و كورد خالقينين تك تمثيلچيسي اولاراق گٶرمور و يو. ائن پي. او.`دا دا بئله تانيتيلماسينا گره ك دويمور، آمما سون ايللرده فارس شيعي ايماميليك و قوندارتي (بيدعت ويلايت-ي فقيه گله نه يي-دوشونجه سيندن دوغان و بونلاري هله ده آچيقجا نقد و ردد ائئتمه يه ن  گاموح حركتي، بو تشكيلاتدا اٶزونون گونئي آزربايجانين تك تمثيلچيسي اولاراق تانينماسيني گره كلي گٶرور؟ بو ايكي تشكيلات آراسيندا گٶرونه ن ايكي فرقلي سيياسي رفتارين ندنلري نه لردير؟

يو. ائن. پي. او. اولاييندا بير تشكيلاتين اٶز ليدئري، تشكيلاتي، بايراغي و خريطه سيني، گونئي آزربايجانين ليدئري، تك تمثيلچيسي، ميللي بايراغي و خريطه سي دييه تثبيت ائتمه يه چاليشماسي، و بونلاري تنقيد ائده نلره گٶسته ردييي ايلكه ل و اويغونسوز موناسيبت، بير يول داها گونئي آزربايجان ميللي دئموكراتيك حركتينده انتئلئكتوئل سوييه نين اولدوقجا دوشوك اولدوغونو، دئموكراتيك، مودئرن و مدني سيياسي اخلاقين بير چوخلاري طرفيندن هله ده آنلاشيلماييب منيمسه نمه ديييني، و بونون يئرينه تاسسوفله لومپنيزمين اولدوقجا گئنيش و درينجه ياييلديغي گئرچه ييني اورتايا قويموشدور.

تورك خالقي اولقون، اوياق، اويغار و چاغداش بير ميللتدير. او، خالقين اٶنده رلييي (بئله بير قوروما گره ك وارسا اولوسلارآراسي سككيلرده (پيلاتفورملاردا) سيياسي تشكيلاتلار طرفيندن تمثيل ائديلمه سي، ميللي بايراق و ميللي سينيرلارينين بليرله نمه سي، و بونون كيمي قونولارين اٶنه ملي سئچيملر و سئچه جك اولانين دا اٶزو اولدوغونو ياخچي بيلير. بوتون خالقي و گونئي آزربايجاني ايلگيله نديره ن بئله قونولار اوزه رينده قرار وئريله جكسه، بير شخص دئييل، اونلارجا سيياسي شخصييت و قورولوش واردير. تورك خالقينين قراري او شخصييتلر و قورولوشلاردان پيلله پيلله سوزوله ره ك اولوشماليدير

بونلارين هاميسيني بير يانا ايته له يه ره ك، بو قونولاردا تك بير نفر و تشكيلات قرار وئره جكدير دئمك، تورك خالقي و گونئي آزربايجانا گوبود بير سايغيسيزليقدير. سيياسي شخصييتلر و يا بللي بير چاباچيلار قوروهونون تك باشلارينا قرار وئريب؛ “سيزين رهبرينيز من، سيزين بايراغينيز منيم بليرله ديييم بايراق و سيزين تمثيلچينيز ده منيم باشخانليق ائتديييم تشكيلاتدير” دئمه لري، صدداملار و رجويلره ياراشان توتاليتئر بير آنلايييشين سونوجودور. تورك و آزربايجان ميللي دئموكراتيك حركتينده بئله داورانيشلار، گئري قالميشليق و فارس سيياسي آنلاييش و ذئهنييتي دييه گٶرولمه لي و ضيدد-ي ميللي اينحيرافلار اولاراق ده يه رله نديريلمه ليدير

سيياسي شخصييتلر و تشكيلاتلار بو يئكه (كلان) ميللي قونولاردا گرچكچي، دوزگون و ايچدن اولماغا چاليشماليديرلار. يوخسا بوتون ساواشيم و آماجلاري اٶزلري و رهبر- دوشونجه- سمبوللاريني خالقا تحميل ائمكدن عيبارت اولانلارلا تورك خالقي و گونئي آزربايجانين ميللي دئموكراتيك موجاديله سينين يوللاري، گون گئتديكجه داها دا آيريشيب بير بيريندن اوزاقلاشاجاقدير. بئله سيياسي اخلاقسيزليقلار و ايلكه لليكلره هامي، باشدا آيدينلار و سيياسي قورولوشلار اولماق اوزره، آچيقجا و كسينجه قارشي چيخماليديرلار. يوخسا اونلار دا تاريخ و خالقين قارشيسيندا بو ايلكه لليك و اخلاقسيزليق و يارانان اولومسوز سونوجلاريندان سوروملو ساييلاجاقديرلار

سيياسي- ايستئراتئژيك يانيلقيلار، ايريمسيزليكلر (ديققتسيزليكلر) ، يانليشليقلار، بيلگيسيزليكلر…..

يو ائن پي او`نون يوخاريدا نقل ائديله ن يازيسينا يانسيميش گٶروشلر، تورك خالقي و گونئي آزربايجان`ين ميللي دئموكراتيك موجاديله سينين ان تمل اٶزه لليكلري و آماجلارينا ضيددير. اٶته ياندان  گاموح بو و داها سونرا دوزه لتيله ن بير سيرا يانليشليقلاري، “كيچيك بير خطا” اولاراق تووصيف ائتميشدير. بوتون بونلار ايسه، گاموحون تئوريك اولاراق تورك خالقي و گونئي آزربايجانين ميللي دئموكراتيك موجاديله سيني آنلاماقدا، تئوريك و ايستئراتئژيك آلانلاردا سون درجه اكسيكليك و يانيلقي ايچينده اولدوغونو گٶسته رير

١- كوردوستان بٶلومونده كورد خالقينين آدي “كورد”، گونئي آزربايجان بٶلومونده ايسه تورك خالقينين آدي “آذري” اولاراق گئچير. گاموحون ياپديغي آچيقلامالاردا ايسه خالقيميزدان “گونئي آزربايجان تورك ميللتي” اولاراق سٶز ائديلير
دوغرو ياخلاشيم: خالقيميزين ميللي آدي، نه آذري و نه گونئي آزربايجان تورك ميللتي دئييلدير. ان بٶيوك بٶلومو گونئي آزربايجان، اٶته كي بٶلوملري ايسه گونئي و هابئله قوزي دوغو ايراندا ياشايان خالقيميزين ميللي آدي، تكجه “تورك”دور

٢- كوردوستان بٶلومونده كورد خالقينين دٶولتله شديييني وورقولاماق اوچون، ماهاباد جومهورييتيندن (Republic of Mahabad (Kürdistan)) دانيشيلير، آزربايجان بٶلومونده نه قاجار تورك دٶولتينين ييخيليشي، نه ده آزربايجان ميللي حٶكومتيندن آد آپاريلمير
دوغرو ياخلاشيم: تورك خالقينين دٶولتله شمه گئچميشي، گله نه يي و بيلينجينه صاحيب اولدوغونو، فارس فاشيزمي طرفيندن بونلارين يوخ ائديلمك ايسته ندييينين آلتيني جيزماق گره كير. بونون اوچون، تورك خالقينين ١٩٢٥ عسكري كودتاسينا دك قاجار دٶولتي سيماسيندا ايرانا حاكيم اولدوغو، او دٶولت ييخيلاندان قيسسا بير سوره سونرا دا گونئي آزربايجاندا اٶز ميللي دٶولتيني، “آزربايجان ميللي حٶكومتي”ني قوردوغو وورقولانماليدير

٣- كوردوستان بٶلومونده، ايرانين كوردوستان ماهاباد جومهورييتيني ايلحاق (دولاييسي ايله ايشغال) ائتدييي سٶيله نير. گونئي آزربايجان بٶلومونده ايسه آزربايجان ميللي حٶكومتي تورپاقلارينين ايلحاق يا دا ايشغال ائديلديييندن سٶز ائديلمير
دوغور ياخلاشيم: آزربايجان ميللي حٶكومتي، تئهرانلا ياپديغي آنلاشمالارا رغمن، پهلوي اوردوسونون گونئي آزربايجانا ائتدييي هوجومو و ايشغاليندان سونرا اورتادان قالديريلميشدير. دولاييسي ايله بو تاريخدن سونرا، گونئي آزربايجان ايشغال آلتيندا بير اٶلكه كيمي ده يه رله نديريلمه ليدير

٤- كوردوستان بٶلومونده كوردلرين ميللي حاقلاريندان (National Rights) دانيشيلير. آزربايجان بٶلومونده آذريلرين آزينليق حاقلاريندان دانيشيلير و بئله جه كوردلر بير ميللت، آذريلر ايسه ايراندا ياشايان بير آزينليق اولاراق (Minority Community Living within Iran) گٶسته ريلير
دوغرو ياخلاشيم: ايراندا ميللي مساله ني، تحريف ائده ره ك آزينليق حاقلاري كاتئقوريسينه سوخماق، مونحريف بير گٶروش و پان ايرانيست بير تدبيردير. تورك خالقي آزينليق دئييلدير، بو اٶلكه و اهاليسيني اولوشدوران اساس ميللتلردن بيري و ان بٶيويودور. تورك خالقينين ساواشيمي دا آزينليق حاقلاري اوچون ياپيلان بير موجاديله دئييلدير، ميللي حاقلاري (اٶزونو يٶنه تمه، اٶز گله جه ييني بليرله مه) اوغروندادير

٥- كوردوستان بٶلومونده كوردلرين ايراندا سيستئماتيك بير شكيلده باسقي آلتيندا توتولدوغو (Systematically Repressed) يازيلير. گونئي آزربايجان بٶلومونده ايسه تورك خالقينين باسقي آلتيندا توتولدوغوندان سٶز ائديلمه ييب، تكجه ياشاديغي قوشوللارين ايييله شديريلمه سي (Improving the conditions) ايسته نيلير
دوغرو ياخلاشيم: ايراندا تورك خالقينين چوخ يٶنلو و سيستئماتيك آسيميلاسييون و آرتان هر طرفلي سيياسي-فرهنگي باسقيلارا معروض قالديغي، بوتون ميللي حاقلاري تاپدالانديغي گئرچه يي وورقولانماليدير

٦- كوردوستان بٶلومونده كورد خالقينين موختارييت و اٶزونو يٶنه تمه حاققيندان (Autonomy and Self-Rule) دانيشيلير. آزربايجان بٶلومونده بونلاردان اثر يوخ، يئرينه ايران`ين دئموكراسييه گئچيشيندن (Transition Towards Democracy in Iran) دانيشيلير
دوغرو ياخلاشيم: ايراندا تورك خالقي و گونئي آزربايجانين ميللي حاقلاري اوغرونداكي ساواشيمي، ايرانين دئموكراسييه گئچيشي كيمي، نه اولدوغو بللي اولمايان بليرسيز (موبهم) آماجلار اوچون دئييلدير. تورك خالقي و گونئي آزربايجانين ساواشيمي، ايكي تمل حاق، “اٶزونو يٶنه تمه” (ايداره ائتمه) و “اٶز گله جه ييني بليرله مه حاقلاري اوغروندادير

٧- كوردوستان بٶلومونده فئدئرال و دئموكراتيك بير ايران (Federal and Democratic Iran) ايسته نيلديييندن سٶز ائديلير. گونئي آزربايجان بٶلومونده نه فئدئراليسم و نه دئموكراتيكله شمه دن سٶز ائديلمير، تكجه ايران`ا دئموكراسينين گلمه سيندن (Democracy in Iran) دانيشيلير
دوغرو ياخلاشيم: اٶزونو يٶنه تمه و اٶز گله جه ييني بليرله مه حاقلارينين فئدئرال، كونفئدئرال و يا باغيمسيز دٶولت سئچه نه كلريندن هانسيسي ايله گئرچه كله شه جه يي؛ دوروما گٶره ده ييشه بيله ن و فرقلي سيياسي تشكيلاتلارين منيمسه يه جه يي آلتئرناتيولردير. بونلارين آراسيندان ايسه فئدئرال و دئموكراتيك بير ايراني ياراتماق، تورك خالقي و گونئي آزربايجانين ايسته كلرينين مينيمومو اولاراق قئيد ائديله بيله ر

٨- گاموحون منيمسه ييب و يو ائن پي او`يا دا سوندوغو گونئي آزربايجان خريطه سي، يانليشدير. بو خريطه نين ان اٶنه ملي قوصورو، گونئي آزربايجانين تئهران اوستانيندا قالان تورپاقلاريني، كئيفي اولاراق آزربايجاندان آييرماسي و فارسيستانا وئرمه سيدير. بو گيريشيم، دئموقرافيك و تاريخي گئرچك و فاكتلارا ضيد اولماقلا بيرلكيده سيياسي آچيدان دا سون درجه ضررليدير. ياخين گئچميشده مشروطييت، خيياباني، ميللي حٶكومت و شريعتمداري تجروبه لرينده ده گٶرولدويو كيمي، تئهران بوتونويله و يا قيسمن آزربايجانين كونترولونا گئچمه زسه، تورك خالقي و گونئي آزربايجانين الده ائتدييي هئچ بير باشاري و حاق، قاليجي اوللانماز و هر آن يوخ ائديلمه يه محكومدور. گونئي آزربايجانين اٶز حاقلارينا قاووشماسي تكجه و تكجه تئهرانين گونئي آزربايجانين تركيبينه داخيل ائديلمه سي و بئله جه آزربايجان دٶولتينين بو شهه ر اوزرينده حاكيمييت ساغلاماسي ايله مومكوندور و قارانتي ائديله بيله ر
دوغرو ياخلاشيم: تئهران، ايرانين باشكندي، بير آزربايجان و ياري تورك-ياري فارس بير شهه ردير. بوراسي ان آزيندان ايكي تورك دٶولتين باشكندي اولوبدور. دولاييسي ايله تئهران پاليغي (كلان شهري) و تئهران اوستانينين توركلرله مسكون اولان اٶته كي بٶلگه لري، گونئي آزربايجان تورپاقلارينا داخيلدير