گونآل آيقار 

سئويشمه دن دوغان سئوگي

                      بيلميرم منيم مکتوبلاريمي اوخويورسان يا يوخ، اوخوماسان دا من سنه مکتوب يازماغا داوام ائده جه یم. آنجاق بیر گون دئسن کي، يئتر آرتيق يازما منه! او زامان سنه مکتوب يازماياجاغام. آمما مادام کي، مکتوبلاشماغا باشلاميشيق من بوتون ايچيمدن کئچه ني يازاجاغام سنه. بو دفعه کي مکتوبومدا سئويشمه و سئوگي حاققيندا يازماق ايسته ييرم.  

                       پلاتون دوغرو سؤيلمه ميش، عشقله باغلي اونون گؤروشلري حيات تجروبه لرينه دايانمير. هر قادينين دوداقلاري نين دادي عئيني دئييلدير. هر کيشينينکي ده. دوداقلارين دادي عئيني اولماسا دا سئکسوال ايليشکيده چوجوق دونيايا گتيرمک مومکون اولور. چوجوغون دونيايا گلمه سي سئوگي دولو سئويشمه ايله علاقه لي دئييلدير. بيلميرم سن بونو تجروبه ائتميسن يا يوخ؟ لئيلي و مجنونا ايمکان وئريلمه میش بير-بيرلريني قوخلاييب، دادلي- دادلي سئويشسينلر. ايمکان وئريلسه ايميش بلکه دوداقلارين فرقلي داددا اولدوغو بللي اولاجاقميش. اونا گؤره ده ائولنمکدن اؤنجه بير نئچه کره اؤپوشمک موطلق لازيمدير. اؤپوشمه زاماني دوداقلارين دادليلیغی و شيرينليگي بير- بيريني کشف ائتسه او زامان حياتين يئني ائوره سي باشلايير. حياتين ان دادلي آني، اؤپوشمک، يالاشماق و اؤپوشمکدير. بو نجيب دويغو، يالنيز اينسانلارا خاص دئييل، حئيوانلاردا دا بئله دير. اينکلر، قويونلار، دوه لر، قويونلار بالالاريني يالاديقلاريندا گؤرموسنمي؟ بو يالاشماق قادين- کيشي آراسيندا حياتين ان چتين سيرلريني آنلادير. بو ذؤوق اوغرونا هر زامان ايچيميزده توکنمه يَن بير ايچ دورتو حيسس ائدريک. فداکارليق و عشق ده بوندان سونرا باشلايير. يعني بير قادين و کيشي بير- بيرلريني دادديقدان سونرا، يا بير-بيرلري اوچون تامامن بيتير، يا دا بير-بيرلري نين دوداغيني، ديليني وسایر اورقانلارینی کشف ائديرلر. بو آنا قدر کي، سورَج سئويشمه اوغرونا ائديلن تلاشدير، سئويشمه دن سونراکي سورج ايسه، يا سؤنوکلوک و توکنميشليکدير، يا دا عشق. موسلمانلارين کيتابي اولان قورآن دا سئويشمه و سئويشمه دن سونرا اورتايا چيخان ايستک حاققيندا فيکريني بيلديرميشدير. بيليرسن زولئيخانين اري اولا-اولا يوسيفدن خوشلانير. سونرا دا يوسيفله سئويشير. سئويشمه نين سينيرلاري آشيلير و زولئيخا يوسيف پئیقمبرله سيکيشمه يه باشلايير. سونرا دا يوسيفه عاشيق اولور. زولئیخانین دیللر ازبری اولان بو عشقی سئکسوآل ایلیشکیدن صونرا باشلاییر. قورآن بو عشقي اؤيور، تقدير ائدير. زولئيخانين يوسيفله ياشاديغي سئويشمه ماجرالاري تانري نين دا ديققتيني چکديگي اوچون، بو حاقدا ايسلام پئيقمبرينه ده بيلگي وئرميشدير. قورآنين ان ائروتيک و سئکسوآل داستاني بو ماجرادیر. اری اولان زولئیخانین باشقاسی ایله سئویشمه سی زینا دئییل می؟  ندن پئیقمبرلر و اونلارین تمثیلچیلری اوچون سئکس سربستلیگی تانینمیش، آنجاق پئیقمبر و دین خادیمی اولمایان ساده اینسانلار اوچون تانینمامیشدیر؟

                      سئکس اينسانا لذت وئرمه مه ليدير سادجه، هم ده اينسانا يارديمچي اولماليدير. اينسانين روحونون تانرييا قوووشماسي سئکسوال لذت زاماني مومکون اولور. آنجاق بو بير- بيرينه اويغون اولان قادين و کيشي آراسيندا باش وئرديگينده گئرچکلشير. يوخسا سئکس تانرييا قوووشماق يئرينه تانريدان اوزاقلاشماغا خيدمت ائده جکدير. پروبلئم ده بو بیر-بیرینه اویغونلوق مسئله سیدیر. بو دادلي حياتين اوغرونا بوتون سیللوللاریمیز چيرپينماقدا، آختاريشدا بولونماقدادير. بو ايليشکي نين دالغالاري اينسان حياتي نين ديگر ساحه لرينه ده يانسييير. آرخايينليق، روحي تمکين و آيدينليغين دوغوشونا بو تور سئکسوال ايليشکي يارديمچي اولور. ائروتيک جاذيبه و گؤزه ليکله زنگين اولان بير قادينين بدني نين ياراتديغي روحسال خاطيره لر توکنمز اولور.  

                      يقين کي، مني تنقيد ائده جکسن کي، قلمين حؤرمتيني ساخلاميرام. من نه زامان قلمه حؤرمتسيزليک ائتديم؟ من تانري نين ياراتديغي اينسان دويغولاري حاققيندا دانيشيرام. تانري گؤزل دويغولاري ياراتميش، سونرا دا اونا ياساق قويموش پئيقمبرلرينه گؤندرديکلري آيه لرله! او زامان ياراتماسا ايدي بو دويغولاري. بيليرسنمي حاققيندا بو قدر دوشونولن عشق فلسفه سي نين حرکت وئريجي ائنئرژيسي سئکسدير؟ سئکسوال ائنئرژيدن محروم اولانلارين سئوگيسي ده اولمور. اينسان اؤزو ده بيلمه دن موتلولوق گتيرن حاديثه لره مئيلله نير. ندن تانري اؤز ياراتديقلارينا ياساق گتیرميش؟ او زامان سنجه بئله بير سوال اورتايا چيخمازمي کي، تانري دا تضادسيزليقدان دئييل، تضادلاردان عيبارتدير. يعني تانري دا بير ائوريمين و تکامولون ايچينده دير. ائوريمي نين بير ائوره سينده بير شئيي ياراتميش و ائوريمي نين ديگر ائوره سينده ياراتديغيني اينکار ائتميش، ياساقلاميشدير. گئرچکدن ده ديندارلار دارويني هئچ اوخومادان اينکار ائديرلر. چونکو ائوريم اولمازسا تانري دا يوخدور. تانري و ائوريم کونوسوندا دوشونمک ياساقدير، بيليرسن. چونکو دين خاديملري حيکمتدن سوال اولماز دئييرلر. آنجاق تانري اؤزو هئچ بير يئرده حيکمتدن سوال اولماز دئمه ميشدير. "حيکمتدن سوال اولماز" دئمک، بيليرسنمي نه آنلاما گلير؟ يعني دوشونجه نين، عاغلين سينيري واردير. بو سينير دا ديندارلار طرفيندن بللي ائديلميشدير. آنجاق نيتچه بو سينيری اورتادان قالديرميشدير. نيتچه دئدي کي، من بشرييتين اؤنونده اولان ان بؤيوک انگلي اورتادان قالدیردیم. "آللاه اؤلدو." "آللاهین اؤلوم خبرینی سیزلره دویورورام ای ضعیف اینسانلار!" ايسته ديگينيز قدر عاغلين، دوشونجه نين اؤته لرينه سفر ائده بيلرسينيز. يئنه ده نيتچه دئيير کي، سئکسوال ايليشکيلره کوبود ياناشماق، اونو آشاغيلاماق، حياتين قوتسالليغيني اورتادان قالديرماقدير. دونيادان ان بؤيوک نعمت حياتدير. بو حياتي بيزلر هئچ بير زامان اؤز عاغليميزلا، اؤز دويغولاريميزلا ياشاميريق. گلنکلرين، دينلرين، ديندارلارين اسکي دويغولاري، فتوالاري ايله ياشاييريق، اونا گؤره ده حياتين نه اولدفوغونو بيلميريک. بيلمه ديگيميز اوچون ده بو گؤزل حياتي اونون- بونون ايراده سينه تاپشيريريق. اونلار دا ايسته ديکلري کيمي ايستيفاده ائديرلر بيزيم حياتيميزي. مثلا دين خاديملري تانري يولونداکي ساواشلاردا خرجله ييرلر بير داها بيزه وئريلميه جک اولان بو موقدس حياتي. تاريخ بويو بو سوالا جاواب وئريلمه ميش کي، تانري هانسي منافعيي اوغرونا ساواش ايسته يير؟ بو اوزدن ده جيهاد فلسفه سينه ايمان گتيرميش و "اؤلسن شهيدسن، اؤلدورسن قاضي" اينانجي ايله ياشايان اينسان اوچون دوشونجه نين بوتون سينيرلاري قاپانميشدير. بونلار اوچون هر شئي داها اؤنجه دن يازيلميشدير. بونلار قاتيلديرلر. بونلارا سئکس حاققيندا دا دانيشماق اولماز. من سنين اوچون يازيرام. آنجاق بيلميرم، امين دئييلم کي، سنده ده اسکيليگه، شرقه خاص اولان کولتور باش قالديرارسا منيم قتليمه فتوا وئره بيلرسن يا يوخ؟ بيليرسنمي بونو ندن سؤيله ييرم؟ چونکو بير اينسان بيلگيدن داها چوخ داورانيش اولاراق بير کولتوره منسوبدور. من چوخ بيلگيلي اينسانلار گؤرموشم کي، يئري گلديگينده بوتون بيلگيلريني اونودوب و منسوب اولدوقلاري کولتورون رئفلئکسلرينه گؤره داورانميشلار. چونکو بيزيم تاريخيميز بير بوشلوقدور، جللادليق تاريخيدير، دين تاريخيدير، مدنييت تاريخي دئييلدير. تاریخيميزده ياريم ساعاتليق خوشگؤرو، دئموکراسي، باشقا کولتورلره سايقي تجروبه سي يوخدور. تام بير يوخلوق ايچينده دير بو آچيدان شرقين دينچي تاريخي. بو يوخلوغون درينلييگينده و دايازليغيندا ايسه بير شئي وار. جيهاد و ساواش. يعني قتل.  

  سنه يازديغيم بو مکتوبلاري باشقالارينا وئره بيلرسن. قوي بوتون ديني تابولار ييخيلسين. اينسانين آزادليغي هر شئيدن اوستوندور. بيز نه قدر ده بدبختيک، چونکو دينين قانون اولاراق تطبیق ائديلديگي بير اؤلکه ده ياشاييريق.  

  25.11.2007 

   Durna